PuthuNutpam - புதுநுட்பம்

Vidque: காணொளிகளின் கதம்பம்

தாரிக் அஸீஸ் — Tue, 05 Apr 2011 12:26:26 +0000

இணையத்தில் காணொளிகளின் வியாபிப்பு மிகவும் வியக்கத்தக்கது. YouTube மற்றும் Vimeo போன்ற தளங்கள் மூலம் நாளாந்தம் பகிர்ந்து கொள்ளப்படுகின்ற காணொளிகளின் அளவு மிகவும் அதிகமானது. (ஒரு நிமிடத்திற்கு YouTube தளத்தில் மட்டும் 35 மணித்தியால காணொளிகள் இணைக்கப்படுகின்றன என்கிறது புள்ளிவிபரம்.) இவ்வாறு இணைக்கப்படும் காணொளிகளில் பொருத்தமான, தேவையான காணொளியை பெற்றுக் கொள்வது அவ்வளசு லேசுபட்ட காரியமல்ல. இந்த நிலையை இலகுவாக்கும் சாத்தியத்தை Vidque செய்கிறது. இதன் மூலம், காணொளிகளின் எண்ணிக்கையை விட அதன் தரத்திற்கு முன்னுரிமை வழங்கப்படுகிறது. தரம் எப்போதும் முக்கியமென்பதில் இருவேறு கருத்திருக்க வாய்ப்பில்லை தானே!

தொடர்புள்ள பதிவுகள்

எதிர்கால இணையத்தின் மொழி என்ன?

தாரிக் அஸீஸ் — Wed, 09 Feb 2011 23:43:22 +0000

ஆங்கில மொழியே இணையத்தின் மிகவும் பிரபல்யமான மொழியாக, இன்றளவிலும் காணப்படுகிறது. நாளாந்தம் ஆங்கில மொழியில் கருமமாற்றும் 550 மில்லியனுக்கும் அதிகமானவர்கள் இணையத்தில் உலாவந்து கொண்டேயிருக்கின்றனர். ஆனால், கடந்த ஆண்டு மட்டும் சீனா மொழியைப் பயன்படுத்தும் 36 மில்லியன் புதிய பயனர்கள் இணையத்துடன் இணைந்து கொண்டார்கள். இதனடிப்படையில், சீன மொழியை இணையத்தின் அடைவில் பாவிக்கின்றவர்களின் எண்ணிக்கை 440 மில்லியனைத் தற்போது தாண்டியிருக்கிறது.

இணையப் பரப்பில் இரண்டாவது அதிகளவில் பாவிக்கப்படுகின்ற மொழியாக ஏற்கனவே உருவெடுத்துள்ள சீன மொழியின் இணையப் பரப்பிலான வளர்ச்சி வருகின்ற வருடங்களில் மிகவும் அதிகரித்தே காணப்படும் என எதிர்வுகூறலாம். எது எப்படியாயினும் மேற்குலக நாடுகளோடு ஒப்பிடுகையில், இணைய உட்கட்டமைப்பு வசதிகளில், சீனா பின்தங்கியிருப்பதும் சுட்டிக்காட்டப்பட வேண்டியதே!

The Next Web, தளத்தின் ஆய்வின்படி, சீன மொழியானது, இணையத்தில் பாவிக்கப்படும் முதன்மையான மொழியாக வெறும் ஐந்து ஆண்டுகளுக்குள் மாறிவிடக்கூடிய சாத்தியங்கள் இருப்பதாக எதிர்வு கூறப்படுகிறது.

இந்தச் தகவல்களைச் சொல்லுமாய்ப் போல் அமைந்த அழகிய தகவல்கள் நிறைந்த வரைபடமொன்றை அண்மையில் The Next Web வெளியிட்டது. கீழே அதனை வழங்கியிருக்கிறேன். அதன் பெரியளவான நகலை, குறித்த நிழற்படத்தை கிளிக் செய்வதன் மூலம் பெற்றுக் கொள்ள முடியும்.

இணையத்தின் மொழிப்பயன்பாட்டுப் பரம்பல் [மூலம்: The Next Web]

இந்தத் தகவல் கோலங்கள் பல விடயங்களைச் சொன்னாலும், அது சொல்கின்ற எதிர்காலம் பற்றிய செய்தி அர்த்தமானது. இணைய நிலைச்சூழலால் தோன்றியுள்ள தொடர்பாடல் முறைகள் எமது உலகத்தின் அர்த்தமான நிமிடங்களுக்கு அத்திவாரமிடுவதாய் அமைந்திருக்கிறது. மொழிகளின் விரிவாக்கத்தால், பல புதிய சிந்தனைகள் தோன்றத் தொடங்கும். அது மட்டுமல்லாமல், பாகுபடின்றி மொழிகள் பற்றி அறிவதற்கான தேட்டம் நிராசையாகவே மக்களிடம் உருவாகும் என்பதில் இருவேறு கருத்திருக்க வாய்ப்பில்லை.

இந்த அடைவுகள் எல்லாம் எமக்குச் சொல்லும் செய்தி ஒன்றேயொன்றுதான், மனிதர்கள் என்ற நிலையில், நாம் மாற்றங்களோடு உலகின் பால் ஒவ்வொரு கணமும் வாழ்ந்திருந்தாலும், எல்லோருக்கும் பொதுவான, எல்லோரும் விரும்புகின்ற விடயங்களும் இருக்கவே செய்கின்றது என்பதாகும்.

தொடர்புள்ள பதிவுகள்

PDF கோப்புகளை இலகுவில் பார்வையிடல்

தாரிக் அஸீஸ் — Wed, 09 Feb 2011 01:32:04 +0000

PDF கோப்புகளை கணினியில் பார்வையிடுவதற்காக விசேடித்த செய்நிரல்கள் காணப்படுகின்றன. அதில் முதன்மையானது, Adobe நிறுவனத்தால் இலவசமாக வழங்கப்படும் Adobe Reader ஐச் சொல்லலாம். ஆனாலும், இந்தச் செய்நிரலானது, கணினியில் செயற்படுத்தப்பட்டதும் அது தொழிற்பட கொஞ்சம் நேரமெடுக்கும். இந்த நேரவிரயத்தை நீக்கி, வேகமாக PDF கோப்புகளை கணினியில் பார்வையிடுவதற்கான சாத்தியங்களை உண்டாக்கியுள்ள பல செய்நிரல்கள் காணப்படுகின்றன. ஆனால், அவற்றில் குறிப்பிடத்தக்கவை இரண்டாகும். Foxit Reader, Sumatra PDF என்பவையே அவையாகும். இவற்றில், Sumatra PDF மின்னல் வேகத்தில் Windows OS இல் இயங்குவதோடு, Adobe Reader இன் சில விஷேடித்த பண்புகளையும் தன்னகம் கொண்டுள்ளது. Sumatra என்றவுடன் உங்களுக்கு சுனாமி சிலவேளை ஞாபகம் வந்திருக்கலாம். Sumatra PDF வேகமாக இயங்குவதால், நேரத்தைக் கொஞ்சம் சேமிக்கலாம்.

தொடர்புள்ள பதிவுகள்

ஜிமெயிலிற்கு எளிமையான இடைமுகம்

தாரிக் அஸீஸ் — Mon, 31 Jan 2011 01:31:18 +0000

இணைய அடிப்படையான செய்நிரல்கள் பல நாளாந்தம் எமது கருமங்களை சுலபமாகச் செய்ய உதவிக் கொண்டேயிருக்கின்றன. ஆனாலும், இணையச் செய்நிரல்களில் நாம் பயன்படுத்தாத சில விடயங்கள் கூட அதன் இடைமுகத்தில் தோற்றமளித்து, திரையின் இடத்தையும் எடுத்து சில நேரங்களில் தேவையில்லாத தாமதிப்புகளையும் உண்டு பண்ணும். ஜிமெயிலில் இவ்வாறு தேவையல்லாத விடயங்களை தவிர்த்து தேவையான விடயங்களோடு, அதன் இடைமுகத்தை எளிமையாகத் தோற்றச் செய்வதற்கான Chrome இணைய உலாவியில் தொழிற்படும் நீட்டிப்பொன்று வெளியாகி அனைவரையும் கவர்ந்துள்ளது. நீங்களும் இங்கு சென்று அந்த Minimalist Gmail என்ற extension ஐ உங்கள் Chrome இல் நிறுவுதன் மூலம் ஜிமெயிலின் இடைமுகத்தை எளிமையாக்கலாம்.

தொடர்புள்ள பதிவுகள்

HTML5: அறிய வேண்டிய ஐந்து விடயங்கள்

தாரிக் அஸீஸ் — Wed, 19 Jan 2011 04:39:17 +0000

எங்கு பார்த்தாலும், HTML5 பற்றிய பேச்சாகவே இருப்பதை நீங்கள் அவதானித்திருக்கக்கூடும். “அந்த இணைய உலாவி அதற்கான வசதியை கொண்டிருக்கவில்லை, ஆனால், இந்த உலாவி கொண்டுள்ளது. இதுதான் சூப்பர் உலாவி” என்றெல்லாம் இணைய ஆர்வலர்கள் கதைப்பதைக் கேட்டிருப்பீர்கள். “இனி Video ஐ Play பண்ண Flash ஐ install பண்ணத் தேவையில்லையாமே! இப்ப HTML5 வந்திருக்காமே!” என்றும் மக்கள் சொல்வதை நீங்கள் கவனித்திருப்பீர்கள். சரி. அப்படியானால், HTML5 என்றால் என்ன?

HTML5 பற்றி நீங்கள் கட்டாயம் அறிந்திருக்க வேண்டிய ஐந்து விடயங்களை நாம் விபரமாகப் பார்ப்போம். அதற்கு முன்னதாய், HTML என்றால் என்னவென்பது பற்றிய தெளிவைப் பெற்றுக் கொள்ளலாம்.

உயிரும் நீயே உறவும் நீயே

இணையத்தின் அழகிய நிலைக்கு ஆதாரமாய் இருப்பது HTML என்கின்ற HyperText Markup Language என்பது தான். ஒரு திரைப்படம் வெளிவந்தவுடன் அதனை ரசித்து பார்க்கிறோம். அதன் உருவாக்கத்தில் திரைக்குப் பின்னால் இருந்து வித்தைகள் செய்தவர்கள் பலர். அது போல, நீங்கள் இணைய உலாவியில் பார்க்கும் இணையப் பக்கமொன்று அழகுற தோற்றமளிக்க காரணமான பல நிலைகள் உண்டு. அதில் முதன்மையானது, HTML என்று விடலாம். இந்த இணைய மொழியைக் கொண்டே இணையப் பக்கத்தின் நிலைகள் உருவாக்கப்படுகின்றன.

இணையப்பக்கமொன்றை உருவாக்குவதற்கு அடிப்படையில், இந்த HTML பற்றிய அறிவு கட்டாயம் அவசியமானது. இதன் அடிப்படையிலிருந்தே இதர இணைய நிலை சார்ந்த மொழிகள் ஆட்சி செய்கிறது. அவைகள் பற்றியும் புதுநுட்பத்தில் சொல்லவிருக்கிறேன்.

ஆக, இணையப்பக்கத்தின் தோற்றம், அமைவு போன்றவற்றை நெறிப்படுத்தும் மொழியாக HTML ஐக் கண்டு கொள்ள முடியும். இனியென்ன, HTML5 ஐப் பற்றி பார்க்க வேண்டியது தான்.

HTML இன் பரிணாமத்தில் இறுதியாக வந்துள்ள அதன் பதிப்புதான் HTML5 என்பதாகும். ஒவ்வொரு பதிப்பிலும், புதிய பல குணாதியசங்களை அறிமுகப்படுத்தி வெளிவரும் HTML, இந்தந் தடைவை கொஞ்சம் அதிகமாகவே, பலரும் ஆச்சரியமாய் பார்க்கின்ற வகையிலான குணாதிசயங்களைக் கொண்டு வருகிறது.

இனி நீங்கள் கட்டாயம் அறிந்திருக்க வேண்டிய HTML5 பற்றிய ஐந்து விடயங்களைப் பார்ப்போம்.

என்ன விலை அழகே!?

“பழைய இணைய உலாவிகள் இந்த HTML5 க்கு தங்களை தயார்படுத்தாத நிலையில், நான் இதனை எவ்வாறு பாவிக்க முடியும்?” என யாரும் கேட்பார்களானால், கேள்வியே மொத்தத்தில் பிழையானது. HTML5 என்பது ஒரு தனியான விடயமல்ல. பல தனியான குணாதிசயங்களின் தொகுப்பு என்று கூட சொல்லிவிடலாம். அதாவது, மொத்தமான HTML5 ஐ ஆளுகின்ற தகவுள்ள நிலையில், உலாவிகளை நீங்கள் காணாவிட்டாலும், அதன் குணாதிசயக்கூறுகளான நிலைகளின் ஆளுகின்ற தகவை உலாவியில் உறுதி செய்து கொள்ள முடியும்.

வெறும், அடையாள ஒட்டுக்கள் (tags) மற்றும் கோண அடைப்புகள் (angle brackets) என்பவற்றாலானதே HTML என்பதை நீங்கள் அறிவீர்கள். ஆனாலும், HTML5 ஆனது, அதற்கும் மேலாக, Javascript ஊடாக DOM (Document Object Model) இடைத்தொடர்பாடல் செய்கிறது. இந்த ஏற்பாட்டால், HTML5 ஐப் பயன்படுத்தியே பல உன்னதமான இணைய நிலைச் செய்நிரல்களை உருவாக்க முடிவது அழகு.

ஓடும் தண்ணியிலே பாசியில்லையே!

நீங்கள் என்னதான் சொன்னாலும், நாம் இதுவரை பாவித்து வருகின்ற HTML 4 கூட அழகான இணையத்தின் அத்திவாரமாகத்தான் இருக்கிறது என்பதை மறுக்கமுடியாது. அதன் வெற்றியின் ஆர்வத்திலும், அடிப்படையிலும் உதிப்பதே இந்த HTML5. ஆக, புதிதாக ஒன்று வந்துவிட்டது என்பதற்காய் பழைய விடயங்களை மறந்துவிடவோ, எறிந்துவிடவோ தேவையில்லை. உங்கள் இணையச் செய்நிரல் HTML 4 இல் நேற்று செயற்பட்டதானால், இன்று அது HTML5 இல், செயற்பட்டே தீரும். அவ்வளவுதான்.

இந்த புதிய நிலை விடயங்கள், தொடர்ச்சியாக முன்னேறிக் கொண்டிருக்கின்ற தொழில்நுட்ப சாத்தியங்களை இணைய உலாவிகளுக்குள் இலகுவில் கொண்டுவருவதற்கான முயற்சி தான். இந்த முயற்சியின் வெற்றி கூட, என்றுமே இயங்கிக் கொண்டு, முன்னேறும் தொழில்நுட்ப அடைவுகளின் ஆதிக்கத்தினால் உருவானதே!

அழகு நிலவே, கதவைத் திறந்து அருகில் வாராயோ!

“இந்த HTML5 ஐ நான் எப்படி எனது இணையப் பக்கத்தில் பயன்படுத்திக் கொள்ளலாம்?” என்ற கேள்வி உங்களுக்குள் எழலாம். பொதுவாக HTML இன் பழைய பதிப்புகளில் எந்த Doctype ஐ பயன்படுத்துகிறோம் என குறித்துக் காட்டுவோம். சரியான doctype ஐ தெரிவது அவ்வளவு லேசுபட்ட காரியமுமில்லை. ஆனால், HTML5 இல், ஒரேயொரு doctype தான். அவ்வளவுதான்.

இப்படி doctype ஐ உங்கள் பழைய HTML கோப்புகளில் மாற்றிவிடுவதால் (இற்றைப்படுத்துவதால்), ஆகாயம் இடிந்து தலையில் விழாது. எல்லாமும் அம்சமாக இருக்கும். அழகு நிலவொன்று உங்கள் பக்கம் அன்பொளி பொழியும். உங்கள் இணையப் பக்கமும் எந்தக் கக்கிசமும் இல்லாமல் இனிதே தொழிற்படும். அத்தோடு, புதிய HTML5 இன் அழகிய நிலைகளை நீங்கள் சேர்க்கும் தகவு உண்டாகும்.

நீயொரு காதல் சங்கீதம்

நீங்கள் உருவாக்கின்ற இணையச் செய்நிரல்களில் canvas, video, audio, local storage போன்றவற்றை பயன்படுத்த நினைத்தால், இருக்கவேயிருக்கிறது HTML5. இன்றைய நிலையில் முன்னணி இணைய உலாவிகளான, Chrome, FireFox, Safari, Opera மற்றும் பல கையடக்கச் சாதனங்களின் உலாவிகள் என அனைத்தும் HTML5 ஐ தாங்கிக் கொள்ளும் நிலையில், பலப்படுத்தப்பட்டுள்ளது. அதுமட்டுமா, புதிய தொழில்நுட்பங்களை தங்கள் உலாவியில் இணைத்துக் கொள்வதை ஆதரிக்காத, அடம்பிடிக்கின்ற Microsoft கூட தங்களின் Internet Explorer 9 பதிப்பில், HTML5 இன் பல குணாதிசயங்களை ஆளும் தகவுள்ள நிலையை இணைக்கவுள்ளதாக தெரிவித்துள்ளது. இனியென்ன..?

HTML5 இன் மூலம் செய்யக்கூடிய வித்தைகள் ஒன்றிரண்டல்ல. அவை எண்ணிலடங்காதவை. இணைய எதிர்காலம் பற்றிய அழகிய கவிதையாய் HTML5 ஐ கண்டுகொள்ளவது தவிர்க்க முடியாததே! HTML5 இன் குணாதிசயங்களைக் குறிப்பதாய் அழகிய Infographics ஒன்று இணையத்தில் சக்கை போடு போட்டது. அதற்கான இணைப்பு இது. கட்டாயம் சென்று உங்கள் நுட்பங்கள் பற்றிய அறிவை பெருக்குங்கள்.

ஆடுவோம், பாடுவோம்..

1990 களின் ஆரம்பப்பகுதியில், டிம் பேர்னஸ்-லீ இணையத்தை கண்டுபிடித்ததன் பின்னர், அவராலேயே W3C என்கின்ற World Wide Web Consortium என்கின்ற இணைய அமையங்களை நிர்வாகம் செய்கின்ற அமைப்பொன்று ஸ்தாபிக்கப்பட்டது. 15 வருடங்களுக்கு மேலாக, அந்த அமைப்பு அதன் பணியை அழகுற செய்து கொண்டு வருகிறது. நேற்றைய தினம், HTML5 இற்கான இலட்சணையை இந்த அமைப்பு வெளியிட்டது.

இலட்சணையை வெளியிட பாவிக்கப்பட்டுள்ள இணையப்பக்கமும் கூட, மிக அழகாகவும், நேர்த்தியாகவும் HTML5 ஐ பயன்படுத்தி உருவாக்கப்பட்டிருந்தது அழகிய அனுபவம்.

சரி. அப்படியானால், இந்த HTML5 ஐக் கொண்டு பலப்படுத்தப்பட்ட இணையத்தளங்கள் உருவாக்கபட்டுள்ளனவா? என்ற கேள்வி உங்களுக்கு எழலாம். பல இணையத்தளங்கள் அழகிய நிலையில் உருவாக்கப்பட்டிருப்பது நீங்கள் அறிய வேண்டிய போனஸ் தகவல். இதோ சில இணைப்புகள் உங்களின் அழகிய அனுபவத்திற்காக.

இணையத்தில் இன்றே எதிர்காலத்தைக் கண்ட பூரிப்பு உங்களிடம் உருவாகிவிட்டதா?

தொடர்புள்ள பதிவுகள்

2010: நுட்பங்களின் அறுசுவை

தாரிக் அஸீஸ் — Sun, 02 Jan 2011 18:56:48 +0000

கடந்த 2010 ஆம் ஆண்டு, தந்துவிட்ட தொழில்நுட்பம் சார்ந்த விடயங்கள் சாதனைகள், சவால்கள் என பல கோணங்களையும் கொண்டவை. பல இணையத்தளங்களும் நுட்பங்கள் சார்பான கடந்த வருடத்தின் போக்கைப் பற்றி, தங்கள் பார்வைகளை வெளியிட்டிருந்தது. அதில் அழகாக வடிவமைக்கப்பட்டிருந்த இந்த Infographics என்னைக் கவர்ந்தது. இதேவேளை, New Scientist சஞ்சிகையின் தொழில்நுட்பம் சார்பான 2010 இன் பார்வையும் பல முக்கியமான விடயங்களை குறிப்பிட்டிருந்தது. அவர்களின் 2010 இன் முக்கிய 10 தொழில்நுட்ப விடயங்களின் தொகுப்பு இங்கேயிருக்கிறது. இதேவேளை, புதுநுட்பம் அன்பு வாசகர்களாகிய உங்களுக்கு எமது புதுவருட வாழ்த்துக்களையும் தெரிவித்துக் கொள்கிறோம். புதிய வருடத்திலும் உங்கள் நுட்பங்கள் பற்றிய புரிதலை விரிவாக்குவதில் துணை நிற்போம் என்று கூறிக் கொள்கிறோம். பல புதிய விடயங்கள் புதுநுட்பத்தில் வரவிருக்கின்றது. புது வருட வாழ்த்துக்கள்.

தொடர்புள்ள பதிவுகள்

தமிழ் குரோம் Transliterate extension

தாரிக் அஸீஸ் — Fri, 31 Dec 2010 02:11:12 +0000

அண்மைக்காலமாக அனைவரையும் கவர்ந்து வருகின்ற இணைய உலாவியாக Google Chrome உலாவியைச் சொல்ல முடியும். அதன் எளிமையான தோற்றம், வேகமான செயற்பாடு போன்றவை இதற்கு முதன்மையான காரணங்களாக இருக்கக்கூடும். Chrome உலாவியில் இயங்கும் தகவுள்ள பல உபயோகமுள்ள extensions நாளுக்கு நாள் அறிமுகப்படுத்தப்பட்டுக் கொண்டிருக்கின்றன. இதேவேளை, இலகுவில் தமிழ் யுனிகோட் முறையில் தட்டச்சு செய்வதை சாத்தியமாக்கும் நிலையை Chrome browser இல் கொண்டுவர நான் ஒரு extension ஐ உருவாக்கியுள்ளேன். இந்த extension ஐ நீங்கள் உங்கள் Chrome உலாவியில் நிறுவி இலகுவில் தமிழில் தட்டச்சு செய்ய முடியும். தமிழ் குரோம் Transliterate என்ற extension ஐ install செய்ய Google Chrome Web Store இற்கு செல்ல வேண்டும். அதற்கான இணைப்பு இது. இந்த extension இயங்கும் முறையைச் சொல்லுவதாய் அமைந்த வீடியோ கீழே இணைத்துள்ளேன். உங்கள் எண்ணங்களை அழகு தமிழில் இலகுவாக இணையத்தில் பகிரலாமே!

தொடர்புள்ள பதிவுகள்

Skype இன் iPhone app மூலம் வீடியோ அழைப்பு

தாரிக் அஸீஸ் — Thu, 30 Dec 2010 16:20:44 +0000

தொலைத் தொடர்பாடலின் நிலைகளை அதிகளவில் இலகுவாக்கிய பெருமை Skype ஐயே சாரும். VoIP என்ற தொழில்நுட்பம் கொண்டு இயங்கும் இந்தத் தொடர்பாடல் சேவை, பல புதிய சேவைகளை நாளுக்கு நாள் அறிமுகப்படுத்துவது வழக்கம். இன்று முதல், iPhone பாவிக்கும் பயனர்கள் தங்கள் கையடக்கத் தொலைபேசிகளில் நிறுவப்பட்டுள்ள Skype செய்நிரலைக் கொண்டு, வீடியோ அழைப்புகளை மேற்கொள்ளும் வாய்ப்பை Skype வழங்கியுள்ளது. இதன் படி, Skype இன் வீடியோ அழைப்புகளை WiFi மற்றும் 3G போன்ற நிலைகளிலிருந்து இன்னொரு Skype பயனருக்கு ஏற்படுத்தும் வசதி ஏற்பட்டுள்ளது. எமது ஆரம்ப அழைப்புகள் துல்லியமாகவிருந்தது பற்றியும் சொல்லியாக வேண்டும். இதேவேளை, கடந்த வாரம் Skype இன் மென்பொருளில் ஏற்பட்ட பிழை காரணமாக தனது சேவை சில நாட்களுக்கு வழங்க முடியாமல் போனதும் குறிப்பிடத்தக்கது.

தொடர்புள்ள பதிவுகள்

பேச்சின் மூலம் சுவையான தேடல்

Dropbox: அறிந்ததும் அறியாததும்

தாரிக் அஸீஸ் — Wed, 29 Dec 2010 17:40:41 +0000

Cloud Computing பற்றிய எண்ணக்கருவை நீங்கள் புரிந்திருப்பீர்கள் என நம்புகிறேன். எம்மில் பலரும் தெரிந்தோ தெரியாமலோ, Cloud Computing உடன் தமது கருமங்களை நாளாந்தம் செய்து கொண்டு தான் இருக்கின்றனர். Cloud Computing பற்றிய புரிதலை கொஞ்சம் விசாலமாக்குவதற்கு கீழ்வரும் காணொளியை அவதானமாகக் கவனியுங்கள்.

Cloud Computing பற்றிய உங்கள் ஐயங்கள் காணொளியைக் கண்டதும், தெளிவாய் பரிவர்த்தனை செய்யப்படலாம்.

இந்த Cloud Computing இன் பிரயோகங்களாக நாம் அன்றாடம் இணைய நிலைகளில் பாவிக்கும் பல விடயங்கள் காணப்படுகின்றன. அந்த வகையில், எமது கோப்புகளை இணையத்தில் சேமித்து தேவையான நேரத்தில் தேவையான இடத்தில் இலகுவில் பெற்றுக் கொள்ளும் வசதியைத் தருகின்ற Dropbox என்ற இணைய நிலைச் செய்நிரலும் Cloud Computing இன் பிரயோகமாகும்.

குறித்த Dropbox இன் மூலம் கோப்புகளை சேமித்து வைத்தல், பகிர்தல் என்ற செயற்பாடுகளைத் தாண்டியும் பல இன்னோரன்ன நன்மைகள் பெற்றுக் கொள்ள முடியும். அவற்றுள் சிலவற்றை நாம் இந்தப் பதிவில் காண்போம். கூடவே, இந்தச் செய்நிரலின் செயற்றிறனை மேம்படுத்தும் நோக்கோடு இதனோடு சேர்ந்து தொழிற்படும் பல செய்நிரல்களும் காணப்படுகின்றன. இவை Dropbox இன் API ஐப் பயன்படுத்தி உருவாக்கப்பட்டுள்ளன.

அடிப்படை விடயங்கள்

Dropbox ஐ பயன்படுத்தி உங்கள் கோப்புகளை இணைய நிலையில் சேமிக்க முடியும். Windows, Mac OS மற்றும் Linux போன்ற பணிசெயல்முறைமைகளில் இயங்கும் தகவுள்ள செய்நிரல்களையும் Dropbox கொண்டுள்ளதால், வேறுபட்ட OS பற்றிய கவலைகளே தேவையில்லை. அத்தோடு, அதன் இணைய இடைமுகத்தின் மூலம் எந்த இணைய உலாவியைப் (Browser) பயன்படுத்தியும் கோப்புகளை Dropbox கணக்கில் சேர்த்துக் கொள்ள முடிவது சுவை.

இந்த சேவையில் நீங்கள் இணைந்து கொண்டதும், உங்களுக்கு இலவசமாக 2GB அளவுள்ள சேமிப்பகம் வழங்கப்படும். அத்தோடு, இந்த அளவை நீங்கள் அதிகரித்துக் கொள்ள முடியும் என்பதும் கவனிக்கப்பட வேண்டியது. அதுவும் இலவசமாகத்தான். உங்கள் நண்பர்களை Dropbox இல் இணைய அழைப்பதன் மூலம், உங்கள் கணினியை உங்கள் கணக்குடன் இணைப்பதன் மூலம், புதிய கோப்புகளை உங்கள் கணக்கில் சேர்ப்பதன் மூலம் என இலவச சேமிப்புக் கொள்ளளவை பெற்றுக் கொள்வதற்கான சாத்தியங்கள் ஏராளம். நண்பர்களை சேவைக்கு இணைப்பதன் மூலம் 8GB வரையான சேமிப்பு கொள்ளளவை இலவசமாகப் பெற்றுக் கொள்ள முடியுமென Dropbox இனிப்பான செய்தியும் சொல்கிறது.

அத்தோடு, உங்கள் கோப்புகளை நவீன ரக கையடக்கத் தொலைபேசிகளிலிருந்தும் (iPhone) உங்கள் கணக்கிற்கு இணைத்துக் கொள்ள முடியும். அத்தோடு, குறித்த கையடக்கத் தொலைபேசியிலிருந்தே உங்களின் கோப்புகளை பெற்றுக் கொள்ளவும் முடியும்.

காற்றிலே கவிதை

உங்கள் நண்பரிடமிருந்து ஒரு கோப்பைப் பெற்றுக் கொள்ள வேண்டும். அதன் கொள்ளளவோ, மிகப் பெரியது. மின்னஞ்சலில் இணைத்து அனுப்ப முடியாது. இந்த நிலையில் என்ன செய்வீர்கள். அதற்கு இருக்கவே இருக்கிறது AirDropper என்கின்ற Dropbox உடன் சேர்ந்தியங்கும் செய்நிரல்.

இந்தச் சேவையைப் பயன்படுத்தி நீங்கள் குறித்த நண்பரிடம் கோப்பை பெறுவதற்கான தேவை அறிவிக்கலாம். அவரும் குறித்த செய்நிரல் அனுப்பிய இணைப்பின் மூலம் அந்த கோப்பினை உங்கள் கணக்கிற்கு சேர்க்கலாம். அவ்வளவுதான். உங்கள் Dropbox கணக்கில் உங்களுக்குத் தேவையான கோப்பு வந்து சேர்ந்துவிடும். கோப்பு சேர்க்கப்பட்ட செய்தியையும் இனிப்பான மின்னஞ்சலாக AirDropper அறிவிக்கும் என்பது கவிதை.

நீ காப்பாய்!

முக்கியமான கோப்புகளை காத்தல் என்பது எல்லோரும் அதிகம் சிரத்தை கொள்கின்ற விடயந்தான். குறிப்பாக எதிர்பாராத விதமாக கணினி கதிகலங்கிப் போய், செயலற்றுக் கிடக்கின்ற நிலையில், அதிலுள்ள கோப்புகளை பல நேரங்கள் மீள அப்படியே எடுத்துவிடுவது கடினமான காரியமாகும். நேரம் அதிகம் தேவைப்பட்ட வேலையும் கூட.

இப்படியான தருணங்கள் ஏற்படாமல், தடுக்க இறுவட்டுகள் (CD) மற்றும் USB Flash Drive களில் எமது முக்கியமான கோப்புகளை சேமித்து வைப்பது வழக்கமானது. இன்னும் சிலரோ மின்னஞ்சலில் குறித்த கோப்பை சேமித்து வைப்பர். ஆனால், மின்னஞ்சலில் காணப்படுகின்ற கோப்பின் அளவு மற்றும் பண்பு சார்பான வரையறைகள் எல்லா கோப்புகளை மின்னஞ்சலில் சேர்த்து விடுவதற்கு வழி கொடுப்பதில்லை. இதற்கான மிக அழகிய தீர்வு Dropbox தான். Dropbox ஐ நம்பியோர் drop ஆக்கப்படார்!

ஆசையில் ஓர் கடிதம்

சிலவேளைகளில், பெரியளவான கோப்புகளை உங்கள் நண்பர்கள் அல்லது உறவினர்கள் உங்களுக்கு மின்னஞ்சலில் அனுப்பி வைப்பர். அவை மின்னஞ்சலின் சேமிப்பக கொள்ளவை அபகரித்துவிடும். ஆனாலும், அவர்கள் அனுப்பிய அந்த கோப்புகளை வெறுமனே அழித்து குப்பைத் தொட்டிக்குள் போட்டுவிட முடியாது. இந்த நிலையில் என்ன செய்யலாம்.

MailDrop, உங்கள் உறவினர், நண்பர்களின் ஆசையான மின்னஞ்சல்களில் இணைக்கப்பட்ட பெரியளவான கோப்புகளை உங்கள் Dropbox கணக்கிற்கு தன்னியக்கமாகவே மாற்றிவிடும் காரியத்தை செய்துவிடுகிறது. இந்தச் செய்நிரலானது, Windows பணிசெயல் முறைமையில் மட்டுமே தற்போது இயங்குகிறது. ஆனாலும், ஏனைய பணிசெயல்முறைகளுக்கான பதிப்புகளும் வெளிவரும் வெகு தொலைவிலில்லை.

நீதான் என் தேசிய கீதம்

இணையத்தளத்தை உருவாக்குவது, அதனை இணையத்தில் இணைப்பது என்பதெல்லாம் ஒரு காலத்தில் மிகப்பெரிய விடயங்கள். ஆனால், காலச்சக்கரத்தின் வேகமான சுழற்சி எல்லாவற்றையும் ஓரளவிற்கு இலகுவாக்கியிருக்கிறது. வலைப்பதிவுகள் தொடங்க எண்ணிய மாத்திரத்திரலேயே, மிக இலகுவாக அதனை உருவாக்கி அவற்றில் உங்கள் கருத்துகளை சேர்த்துவிட முடியும். இதற்கு துணை புரியும் தளங்களாக, Blogger மற்றும் WordPress.com தளங்களை குறிப்பாகச் சொல்லலாம்.

ஆனாலும், நீங்கள் ஒவ்வொரு எழுத்தாக அழகு பார்த்து செய்த உங்கள் அழகிய HTML மூலம் செய்யப்பட்ட இணையத்தளம் இணையத்தில் எப்படியிருக்குமென பார்ப்ப வேண்டுமென்றால், குறித்த HTML கோப்புகளை இணையத்தில் எங்கே இலவசமாக சேர்க்கலாம் என்ற கேள்வி எழுகிறதல்லவா?

இந்த விடயத்தை செய்வதை சாத்தியமாக்கும் பல சேவைகள் இணையப்பரப்பில் இருந்தாலும், உங்கள் Dropbox இன் Public Folder ஐ இணையத்தளத்தை சேமித்துவைப்பதற்கான இடமாகப் பயன்படுத்தலாம். Public URL ஐப் பெறுவதன் மூலம், உங்கள் இணையத்தளத்தை சாதாரண இணையத்தளமொன்றைப் போல், உலாவலாம். ஆச்சரியங்கள் தரும் சாத்தியங்களின் ஆரம்பம்தான் இந்த Dropbox. பரீட்சாத்தமாக இணையக் கோப்புகளை பரிசோதனை செய்ய உகந்த இடம்.

இங்கு HTML, JavaScript போன்ற இணைய நிலை மொழிகளை கோப்புகளில் பயன்படுத்த முடியும். ஆனாலும், PHP போன்ற மொழிகளைக் கொண்ட கோப்புகளுக்கான சாத்தியங்கள் Dropbox இல் இணையநிலை பாதுகாப்பு கருத்திற்கொண்டு Enable ஆக்கப்படவில்லை.

இதோ Dropbox இன் Public Folder இல் நான் இணைத்துள்ள மாதிரி HTML எளிய இணையப்பக்கத்தை காணலாம். இணைப்பு

இன்னும் பல சாத்தியங்கள் கொண்ட இந்த Dropbox இன் அழகிய நிலைகள் பற்றி ஆழமாகச் சொல்லவிருக்கிறேன். அதுவரையில், Dropbox சென்று உங்கள் கணக்கை உருவாக்கி, ஆனந்தம் பெருக.

தொடர்புள்ள பதிவுகள்

நகைச்சுவை கலந்த சாதனக் கையேடு

தாரிக் அஸீஸ் — Wed, 22 Dec 2010 16:15:33 +0000

Google இனால், அண்மையில் வெளியிடப்பட்ட Chrome OS கொண்டு இயங்கக்கூடியதான Cr-48 மடிக்கணினிகளைப் பற்றி நாங்கள் புதுநுட்பத்தில் குறிப்பிட்டிருந்தோம். குறித்த மடிக்கணினியை குறிப்பிட்ட பயனர்களுக்கு பரீட்சாத்தமாக செயற்படுத்தி அதன் செயற்றிறனை கணிப்பிடும் நிலையை Google நடத்தி வருகிறது. இந்த மடிக்கணினியோடு வழங்கப்படும் User Manual (பயனர் கையேடு) மிகவும் சுவாரஸ்யமானது. குறிப்பாக பயனர் கையேடுகளை யாரும் கணக்கிலெடுப்பதில்லை. ஆனால், நகைச்சுவை கலந்த நிலையோடு, உருவாக்கப்பட்டுள்ள இந்த பயனர் கையேடு வாசிப்பதற்கு மிகவும் சுவாரஸ்யமாகவிருந்தது. வாசித்துப் பாருங்கள். நீங்கள் முதன் முறையாக முழுமையாக வாசிக்கும் User Manual ஆக அது கட்டாயமிருக்கும்.

No related posts.